Dangdang anggen maka puspane kawidi,
Dumogi kwara nugraha,
Tan surud tityang ngredana,
Nunas asung ring Hyang kawi,
Krana tityang jatma tambet,
Kadi lontar tanpa tulis,
Tuna sastra tuna budi,
Sekadi aksine kedat tanpa wasan,
Mogi mahyun,
Sang Hyang windu menagingin.
Majeng maring sang apradnyan ring mangurit,
Geng ampura atur tityang,
Lengkara lan kruna basa,
Kirang langkung tuna luih,
Napi malih pengarcana,
Sigug punggung mapi uning,
Naning pangkah menyarengin,
Dasar asore tan renga mapengawyan,
Kirang langkung,
Sweca ugi ngawewehin.
Caritayang Duryadana sani mangkin,
Ngawentenang peparuman,
Kocap ring puri Astina,
Sametone make sami,
Para ratu pada prapta,
Resi Drona menyarengin,
Baos pacang ke paumin,
Payudane sang pandawa lan korawa,
Putra kuru,
Rumasa ring ke kandapin.
